二少爺田北辰果然有貴人相助，好似早兩個月，佢先有九鐵兵變威脅，成間公司高層一齊郁佢，結果佢絕地反擊，雖然九鐵要被地鐵吞併，但佢嘅敵人就要黯然下台。
九鐵兵變之後，二少又面對家變危機。事關佢被本雜誌影到佢去接個空姐。你知喇，二少一向係好丈夫好爸爸典範，二少奶點受得起呢啲刺激呢？所以大家都替二少爺擔心。不過呢場小風波已經解決咗。
事緣八方前晚去亞洲國際博覽館睇JamieCullum，呢個場喺赤鱲角鬼死咁遠，但個個都話好值得聽，$988一張飛都唔貴，而且只演一場唔聽就冇，咁就去啦。點知見到田二少，佢原來都係爵士迷，身邊有位白衣靚女，就係二少奶梁錦儀。佢哋兩人好親密咁入場睇騷，二少仲搭住田太膊頭，見到記者亦冇避開。
除咗九鐵個掛名主席之外，田二少本身有生意，就係G2000。大家行商場相信好易認到佢哋啲舖，二少亦話自己好鍾意着G2000嘅衫。幾年之前，有傳過呢間連鎖服裝店生意差咗，要佢阿哥出手相助，後來搵到新地幫手至度過難關。
講起G2000，最近中環流行一個口頭禪，就係「支二千」。八方都唔明佢哋指乜，但每次見班男人講完就咪咪嘴笑，肯定唔係好嘢，你話同呀二少嘅G2000有冇關呢？
傳真︰2623-9278
電郵︰[email protected]