中信泰富停咗牌，事涉國泰收購港龍，有關人等成為傳媒焦點。華華咁啱喺街上遇到中信泰富董事總經理范鴻齡，佢當然冇講任何關於公事嘅嘢，更加冇回應呢單大Deal，只係傾吓閒偈。
范鴻齡話上周五好忙，做到好晏先收工，當日係佢58歲牛一，本來一早已經訂咗淺水灣酒店間Veranda餐廳食飯慶祝，但因為一件重要嘅事，搞到晚黑9點幾先開到飯。當晚佢收到唔少生日禮物，其中一份係寫住「一帆風順」嘅船。
等退休睇現場世界盃
咁係乜嘢「重要嘅事」，令范鴻齡生日餐飯都要讓路呢？唔係單大Deal，而係當晚佢要出席恩師BrotherKenny追思會。呢個追思彌撒喺傍晚7點舉行，范鴻齡由中環趕入石硤尾聖芳濟各堂，到8點幾至走。
范鴻齡話，Bro.Kenny係佢中學校長，亦係聖芳濟書院首任校長，佢當時成績普通，但校長好錫佢，直頭當佢仔一樣，兩個人成日一齊去界限街花墟球場睇波；佢最記得Bro.Kenny每次睇波時，都好投入咁大叫！有呢段咁深師生感情，唔怪得之佢生日，又有大單交易傾緊，都堅持要抽時間去悼念。
講到睇波，梗要提吓世界盃，范鴻齡話只會睇準決賽同決賽，自己由細到大都係捧巴西，最鍾意嘅球星就係「大哨」朗拿度，佢仲話一世人點都要親身去現場睇一次世界盃，之不過呢個夢想，睇怕要等退休之後先至可以實現。咁幾時退休？佢話：「連自己都未知呀！」
李華華