左丁山嘅寫字樓隔籬，有個單位出租，本來丟空好耐，突然間有人承租，因為單位細，每呎計雖然租金高昂，但總租金仍然可以負擔。
邊位租咗呢？唉吔！世界真係小小小，竟然係專做環保、環境清潔嘅老友環保K。環保K與老友合組環境清潔顧問公司，到中環開檔，搞寫字樓裝修，講求快夾妥，兩個禮拜就入伙，最大特色就係採用環保光管。而光管係另一位朋友、以前做記者嘅老編L供應嘅。
老編L十幾年前轉型，佢認為做新聞冇乜前途，先轉行做地產，推銷內地樓盤，再第二次轉行，經營環保照明（lighting）用品。呢日老編L探訪環保K，順便到左丁山寫字樓望吓，佢一啲都唔客氣，指左丁山浪費，室內光管太多，浪費電力，全不環保。左丁山點鬼知呀，以前全部聽晒裝修公司話，冇人講過要用幾多支光管噃。聽罵之後，問多啲，原來經過專人推介，老編L教咗某大物業管理公司使用環保光管，首先在面積大嘅停車場試用，原本用一百支五十火光管嘅停車場，現在只用七十支三十火嘅光管，慳番好多，但至今未有泊車人士投訴噃，證明掂啦。
睇落，環保光管生意有可為噃，只可惜，老編L竟然嚟第三次轉型，話不久之後就會移民多倫多，同香港講拜拜。乜十幾年前唔趁九七將至而移民，今時今日去移民呀？好蝕底啫！如九七前賣樓移民去多倫多，正是貴樓換平樓，好着數。但九年來多倫多樓價猛升，加元創二十八年新高，偏偏香港樓價仍然低於九七兩三成，一來一回，搬去多倫多，真係計唔掂數，但是人各有志，老編L以家庭理由移民，唯有祝福佢。
今日之當紅人物新聞統籌專員安迪，初出道做英文報紙記者之時，跟過老編L學師，當日老編L係政治版編輯，指點安迪採訪政治新聞，完全冇諗到呢位新畢業生日後如此巴閉。老編L其實名師出高徒，唔少其他英文報紙記者跟過佢，香港社會環境竟然對佢失去吸引力，可惜也。