外圍美、日股市進一步下挫，港股昨日終於頂唔住，恒指跌156點，收15816。相對於其他亞洲股市如日本、台灣等，港股其實算跌得少，但正所謂「覆巢之下無完卵」，如果環球股市真如大摩所言已進入熊市，港股相信亦唔會好得去邊，可能只是早跌早到底，遲跌遲到底而已。
不過，讀者亦唔使太悲觀，大摩現時說環球股市已步入熊市似乎早咗啲，有好多嘢仍未確認，近日陸續有美國聯儲局官員走出台前話要加息防範通脹，但不排除稍後公布的經濟數據無咁強勁，佢哋又再轉口話唔使加息。
美國經濟數據之多，誇張啲講句可以說多如牛毛，以往格林斯潘甚少因為一兩個數據即發表對息口趨向言論，但現時的聯儲局官員則如百家爭鳴，遲早搞到公信力盡毀。
假如稍後港股以至環球股市出現大反彈，其中一個主要動力，就是息口見頂，到時將由銀行及地產股帶動回升。既然美國聯儲局主席都話要看經濟數據才決定息口去向，大家不妨再多睇一段間才作定斷。
但從技術走勢角度看，美股及日股的走勢正急速轉弱。杜指周二晚未能重返頭肩頂頸線16030之上收市，不過暫時跌穿不多，是否真跌穿仍有待觀察，或者周三晚已有答案。
配股完畢 中行腳軟
港股昨日值得注意是中行（3988）未能連升5日，跌1.4%，收3.525元，而巧合是中行的超額配股權剛被悉數行使，達38.35億H股，佔全球發售的H股約15%，每股定價亦是2.95元。
前日講過，中行上市後一直造好，港股走勢亦明顯較前硬淨，昨日中行配股功德圓滿，股價即未能保持升勢，而港股昨日恰巧亦跌幅擴大至156點，未知對後市走勢有否啓示。
趙飛雲