金庸小說《射鵰英雄傳》裏面嘅老頑童周伯通俾東邪困喺桃花島，練成一心二用嘅神功，可以左手畫圓右手畫方，估唔到呢項絕技到咗今時今日終於有傳人，呢位高手就係教統局局長李國章。
李局長噚日喺立法會回答議員有關副學士嘅提問，問答原本都好正路，不外乎自吹自擂副學士出路幾咁好，點知輪到李局長嘅死敵張文光提問，氣氛就開始有少少火藥味，張文光問既然講到副學士出路咁好，不如政府翻查吓資料，睇吓本身究竟請咗幾多個副學士畢業生做公務員，李局長竟然答話，要翻查16萬公務員嘅學歷，無乜意義兼浪費資源，李局長呢句話結果就引發咗一場舌戰。
擦老師鞋 暗踩議員
跟住到長毛梁國雄提問，就挖番李局長三年前喺立法會會議期間打機嘅舊事，話好彩李局長無打機，唔係就聽唔到議員嘅寶貴意見，搞到李局長終於忍唔住出手，佢話局長嘅能力好多，聽嘢係用耳仔去聽，打機係用手去打，唔知議員係咪唔可以兩樣嘢一齊做，局長就幾時都可以做到。
高官係太極高手就係人都知，估唔到原來仲收埋呢招一心二用嘅絕技，不過議員都唔係弱手，即時有人發功反擊，劉慧卿話，希望大學、中學同小學嘅學生都唔好以李局長做榜樣，上堂打機俾老師鬧就話局長都得，點解我唔得？身為大學講師嘅楊森亦話希望大學生唔好一邊上堂一邊打機。
議員擺明係暗寸李國章作為教育統籌局局長，教壞全港學生，但係李局長點會就此認輸，佢臨尾仲氣定神閒咁話，上堂老師講嘢非常重要，非常動聽，學生一定專心聽老師教導，李局長使出一招一石二鳥，就擦晒全港教師鞋，仲暗踩議員講嘢無料到，果然係高手。
傳真︰2623-9278
電郵︰[email protected]