國際證監會組織（IOSCO）周年大會噚日喺會展開幕，煲呔喺雲南未返，所以由許仕仁主持開幕禮。香港證監會作為東道主，梗要有啲好嘢畀來賓睇，所以先由警察風笛隊帶領主禮嘉賓進場，之後有舞獅表演，實行搞到成個場虎虎生威，對住啲市場違規人士，唔打得都嚇得吓。
呢個IOSCO大會，每年會喺唔同國家舉行，舊年喺剛被海嘯蹂躪嘅斯里蘭卡舉行。原本一直推動參與嘅係香港證監會前主席沈聯濤，可惜喺成功取得主辦權後佢冇得續約留低，不過唔緊要，佢喺星期一，大會在港舉行預備會議時，都有去會展見吓啲老朋友，噚日佢就冇現身，留番畀現任證監主席韋奕禮攞彩。
儀式上許仕仁（右3）盡展搞笑本色，逗得IOSCO執委會主席JaneDiplock（左3）開懷大笑，韋奕禮（右）冇你咁好氣，點好睛至講。梁鑑章攝