森美、小儀主持嘅電台節目《架勢堂》早前搞咗個「我最想非禮嘅香港女藝人」選舉，搞到滿城風雨，雖然佢兩個已經開記招道歉，不過坊間批評之聲仍不絕於耳，教育統籌局局長李國章已向廣播事務管理局作書面投訴。
「要做嘅都做咗」
噚日阿姐汪明荃現身電視城，出席新劇《東方之珠》拜神儀式嗰陣，就狠批森美小儀教壞細路，佢話：「我有睇報紙，咁樣好嚴重，係犯法，佢哋影響唔少青少年，唔應該有呢啲錯失，如果係要出位，就係態度有問題。」阿姐仲話香港教育嘅制度都有責任。講開又講，原來阿姐以為佢兩個年紀好細，當知道森美已為人父後，阿姐就更加勞氣，仲話：「咁就更加唔好，唔好口輕輕，我都擔心佢兩個個節目，電台係入屋，好大影響。」
對於事件要交畀律政司司長研究有冇觸犯刑事罪，森美噚日回應話：「對於呢件事，已經道歉，現時都未收到新進展，要做嘅都做咗。」講番佢兩個主持嘅遊戲節目《15/16》收視受到影響，小儀就話：「呢個係兩件事，啱啱監製都話星期二升番，相信係唔會影響我哋演出。」
