喺中環辦公對好多人嚟講係身份象徵，就算畀貴貴租都覺值得，若果只租用幾百呎單位，重皮極有限啦。
中環皇后大道中九號13樓11室，面積306呎，係少有嘅供應，個單位其實係𨋢槽位嚟嘅，當年成層畀個客買咗再間細而成嘅。中原香港商業部營業董事陳叔仲話，單位啱啱以月租約1.1萬，呎租36蚊租出，計落高市價少少。
𠵱家皇九一般單位呎租35至40蚊。
有見呢類單位咁受歡迎，另一個16樓06室嘅𨋢槽位，有成810呎，業主乘勢放盤，叫價每呎1.1萬。
蘭西今年初都有提到，中環美國銀行中心同金鐘力寶中心，有小量𨋢槽位單位，買家購入再放租，回報有成8厘，和味過揸普通單位得3、4厘回報。