𠵱家一街都係大學生，搵份普通工都成村人爭，不過，有啲搶手學科嘅高材生，未畢業已有公司請咗，現實就係咁殘酷。
近年逢招聘會例必爆棚嘅情景，仍然持續。噚日喺銅鑼灣香港中央圖書館搞嘅招聘會，有份參與嘅地產代理行，每間都收到幾百份申請職位表格，睇嚟表面上係搵快錢行業之一嘅地產經紀，仍然備受莘莘學子歡迎。
香港置業董事楊彩鳳話，佢哋收到700人登記應徵前線及後勤職位。另外，為集中培訓可造之才，即日起推出一個名為「明日之星」職前培訓課程，應徵而又獲選嘅大專生，公司會提供免費地產代理考牌課程，一共4堂，內容主要係行業知識及運作實務認知等，如果表現好，仲會獲得聘任，考埋個牌，正式做代理搵真銀。
招聘會上嘅另一代理行，世紀21總經理馮倩儀講，佢哋收到800份申請表，獲聘人士會有課程培訓。至於同場免費派發嘅「壓力有解決錦囊」，100份「渣」一聲就派晒，原來真係好多人想減壓咁喎。
電郵地址：[email protected]