華華前日同恒生個人理財及財富業務總經理梁永祥食飯，事緣佢幫母校浸大搞活動，見吓傳媒。呢位熱心校友仲大爆情史，話同太太喺浸大相識，之所以娶到個老婆，係緣於大學水運會及陸運會！ 話說當年浸大水運會，梁永祥係司令員，嗰日天氣都幾凍，佢一心諗住快快手開槍開始個比賽，等啲人唔使騰騰震，點知當日個司儀唔識做，係咁講唔停口，佢咪走去同對方理論，大家估得冇錯，當日個司儀，咪就係今日嘅梁太！ 梁永祥話，佢哋當時只係算識咗，之後陸運會大家再次重遇，呢次佢就把握機會，即刻約對方食飯，日後嘅發展，都唔使多講啦！