14位入圍香港先生昨日會見傳媒，各施騎呢絕技，「潔癖羅莽」梁國賢扮未來戰士被毆，力敵大晒41吋胸肌的「粗獷吳家樂」林祐飛。
無綫「香港先生競選」14位參賽者昨日在尖沙嘴日航酒店首度與傳媒見面，眾人除了自我介紹外，又即席表演顯才藝。參賽者中最年輕是19歲的9號楊江夏，在現場表演花式單車；最年長的36歲10號蕭卓明，表演彈結他唱英文歌。
魔術穿崩
一眾男士雖然經過改造，但依然不減騎呢風格，問「潔癖羅莽」4號梁國賢為何參選和有否信心，他均表示不知道。但對於被指似羅莽，他卻興奮地說：「我鍾意羅莽，唔介意俾人話似佢。」表演時，潔癖羅莽穿上皮褸兼戴上黑超扮未來戰士，被打至嘭嘭聲仍面不改容，事後他說：「我好欣賞阿諾舒華辛力加（ArnoldSchwarzenegger），所以扮呢個造型。」
而「粗獷吳家樂」12號林祐飛憑41吋胸及15吋手臂，搶盡風頭，他說：「我未谷有41吋胸，谷咗冇度過，我覺得畀多一個月我操，會更加弗。」而前海軍陸戰隊成員14號梁偉權，報稱現職營業主任，他表演自衞術時要拍檔協助擺出招式，其中一招將對方手部放在其下體附近，動作惹笑。而11號王天就大玩魔術，一邊玩火，一邊變出玫瑰花送給丘凱敏，可惜穿崩！不過鬼馬絕技仍獲得讚賞。
採訪：卓寶花 攝影：陳慧安
