港股大跌之後，走勢變得好飄忽，前日同噚日直情係兩個樣。前日人人估要跌二三百點，個市就一個拗腰，抽番上去，只小跌43點；噚日諗住都會有反彈啩，點知仲杰，恒指唔單止一度大跌近200點，尾市亦無力反彈，收15816，跌156點，10日線（15860）又失守。
跌市之後，信心未復，人人等個市再試底，關鍵係15600關口守唔守得住。噚日同芬佬攞料，佢哋基本上唔睇得太淡，短期會係上落市，在15600至16000間反覆，等時機成熟，就會出現一次真真正正的反彈，有機會「掂一掂」50日線（16330）。
中資股普遍都回軟，石油股則跌得較多，拖累H指大跌95點。內地銀行股最靚係建設銀行（939），平收3.50元，基金同大戶繼續食貨，只要個市氣氛好轉，大戶就會推佢上去。
金威集團（910）抗跌能力好強，噚日收0.335元，紋風不動。
上月初推介，當時金威股價0.295元，月中已升到最高0.38元，之後出現整固，家吓走勢形成上升三角形，只要升破0.345元阻力，升浪又會再起，照度上去，目標係0.45元。
07年後盈利可倍升
金威原本係做成衣同納米材料，自進軍高科植林業務後，股價表現即脫胎換骨，市場評價提升，聞說呢兩三個禮拜有多個基金敲門，想攞貨，但公司婉拒；因此，唔排除芬佬會在市場吸納，若見有異動，即可跟進。
金威以新股、CB同現金，合共5.6億元收購北京萬富春70%權益。萬富春所做嘅唔係普通植林，而係一個改造荒漠成為良田嘅高新科技項目，由中科院經8年才研究成功，並已註冊專利。
萬富春現時在山東省擁有30萬畝租賃期達50年的農地，以及用作培植經改良樹種桑科構樹為數不少於1億株的樹苗，今年第2季開始植林，並已保證06年及07年兩年的稅後溢利不會少過2億元。金威05年（12月年結）只獲利245萬元。
進軍高科植林，廢地利用，成本極低，利潤極大，桑木構樹快高長大，第二次長出樹木產量，可較第一次多出一倍，即係07年後，盈利仲會倍升。
郭兆誠