賣電子辭典起家嘅權智主席譚偉豪，24歲創業，29歲做上市公司主席，噚日佢為一個徵文比賽做嘉賓，同班大學生講自己嘅志願，以及創業經歷，仲自爆話：「怕老婆係成功創業條件之一。」事關每當有唔做得嘅嘢，佢唔會直接話唔做得，只會話自己怕老婆，對方唔畀做。佢咁講，搞到陪佢到場嘅譚太梅嘉慧，笑到停唔到口。
譚偉豪話，畢業第一份工係朋友介紹，人工$2700，當時其他同窗有成4千蚊，佢算係偏低。譚偉豪話，人工低都有好處，起碼老細唔敢炒自己，而且成日都有人工加，年幾就升到萬幾蚊，之不過自己想多啲空間發揮，打咗2年工就劈炮，自己創業。
而講到志願，佢話細個好鍾意踢波，志願係做足球員，不過嗰時仲未有碧咸呢個賺錢人辦，咁父母就梗反對喇，結果入大學揀工程，一心一意做專業人士。雖然足球員做唔成，但4年一度世界盃就一定捧場，仲會帶埋老婆同個仔，飛去德國睇決賽，最睇好巴西，其次係英格蘭。