對於曾特首話佢冇參加過《民主歌聲獻中華》同埋冇參加過支聯會活動呢單嘢，講真，我冇乜興趣去深究。所以華叔出席商台節目俾主持人追問有冇證據，華叔話冇心思去搵證據，我認為佢答得好。
搵到證據咁又點啫？你估佢會冇得連任？梗係唔會啦。
要「政治洗底」嘅唔單止佢，大家只不過睇你係唔係洗底洗得靚咁解啫。曾特首今次就洗得唔靚。
過咗海當然係神仙，過唔到個海呢？
𠵱家就係叫人搵料證明自己唔老實。
人哋問你有冇參加過，你大可以話：「我嗰日喺香港。」咁記者一定會追問你有冇去過呀？咁你咪答：「我嗰日喺香港，唔係喺九龍。Youknowthedifferencebetween香港and九龍？I'msureyoudo.Nextquestionplease.」
係低B咗，不過高手啲喎。
呢單嘢令我聯想到跟住嚟嘅父親節。
曾特首係特首我哋知，曾特首係人哋老竇我哋知；但係曾特首點教仔我哋之前唔係好知𠵱家知。
做乜你要拉個仔落水啫？
你知唔知有個又係姓曾而叫國藩嘅名人點教仔㗎？唔知就應該睇吓佢嘅家書。
嗱，「政治正確」㗎，毛主席話佢最服呢個姓曾㗎。毛主席話嘅咁你重唔快啲做功課？
曾特首身在雲南參加泛珠三角經濟論壇，公開話自己冇參加過支聯會任何活動；新聞統籌專員何安達之後補充話，當日曾蔭權係同當年13歲嘅仔喺馬會共晉晚餐後離開碰見司徒華咁啫。
做乜有呢一筆呢？做乜要話佢13歲咁準確呢？睇嚟嗰日唔係個仔生日啩？華叔回憶當日曾蔭權拖住個細路，主動對佢話：「我同個仔剛剛參加完民主歌聲獻中華，我哋走啦。」
如果係事實嘅我諗佢個仔一定問老竇做乜要去呢個地方，而作為一個負責任嘅父親曾蔭權一定會解畀個仔聽；如果唔係事實嘅咁好自然咪兩父子一齊出嚟話：「我哋冇參加，我哋喺去咗馬會食飯。」講完。
我望都望曾特首講嘅係事實，咁只係一場誤會；但係如果你講大話，咁我會問：你咁教仔，點做特首?!
觀火
傳真︰2623-9278
電郵︰[email protected]