美國經濟響格林斯潘做主席嘅日子，好好醜醜贏多輸少，加上佢一上任之後減息救市有功，令美國人知道萬大事有佢老人家照。美國股壇甚至有一種講法，話每買一張股票，聯儲局嘅存在就等於一張免費「認沽權」（GreenspanPut）。股民放膽入市，個市又點可能唔升呢？不過話說回頭，可能格老令人太放心投資/機，所以任內都出現過好幾次危機同泡沫，但託佢洪福，總算無驚無險。呢位聯儲局主席，經歷列根到老布殊到克林頓到小布殊，如果冇真材實料又邊可能有呢種待遇？
可惜人始終會老，格老1926年出世，唔通真係要佢做到80歲都冇得退休咩！美國堂堂世界第一大國，唔通搵個似樣啲嘅人做主席都冇咩！就係咁抵死，美國人總統可以換，但主席就千揀萬揀，都冇合適人選，結果畀呢個一啲都唔紅嘅「白藍黑」上場。
格老高招收埋大權唔用
言多必失係中國人嘅成語，換了老外嗰句就係silenceisgolden。世間少有好似佢老人家咁手握大權，但又知道用權嘅最高境界，就係將權力收起唔用，呢的咪叫做政治智慧囉。多數有權在手嘅，唔係「也文也武」慌死人哋唔知佢升官發財，要強政勵治過吓官癮。好明顯呢位學究出身嘅伯南克，完全唔明白政治，更加唔明白財經市場，結果係又講，唔係又講，慌死啲人唔知到新官上場。以前格老做聯儲局主席一句「非理性亢奮」，講得啱都要俾人鬧，所以之後全世界都唔知佢噏乜，呢種「變相沉默」令佢老人家連續成為「我最喜愛勁爆主席」。
𠵱家華爾街已經好睇唔過眼伯南克口多多。老實講，華爾街啲大孖沙響政治上出錢出力出心，而且卧虎藏龍，隨時搵三幾個諾貝爾經濟學得主篤伯南克背脊話佢唔掂，又有何難？不過伯南克都算知機，早排話唔會監管對沖基金，所以暫時叫做避過一劫。利世民只可以講句，花無百日紅，累人輸錢罪大惡極。如果伯南克想做得長長久久，就唔該佢緊記要冧掂大小股民，呢一句同樣適用於特區政府諸公。
美國遲早俾大政府害死
講開伯南克，就不得不提美國𠵱家嘅經濟局面。大家千祈唔好以為利世民係悲觀主義者，先至話喺未來日子美國息口同通脹會繼續拍住升。事實上，利世民係睇好未來中國，所以睇美國息口通脹升。簡單講，中國出口產品賺美金，然後又將美金買美債，美國政府就可以不斷發債猛搞大政府，美國人就可以不斷買平貨。不過世界上冇免費午餐，出得嚟行預咗要還，只不過冇人知究竟幾時還。
呢個煲要爆，會點爆呢？首先，如果大家都唔再信美國政府有能力還債，第一時間當然係賣債券啦。經濟學101教，人人賣債券，債券價格落，息口就升。第二，賣債券之後，又點會仲有人揸美鈔咁笨？所以當人人都沽美金，美金又點可以抵擋地心吸力？
當美金跌，國內物價自然相對提高，特別係入口貨，咁自然有通脹。有個專炒金嘅朋友話，如果呢個煲要爆，就會令日後嘅歷史話，1930年代大蕭條就好似去郊外野餐咁閒。我問你怕未！
孫柏文