Zevil對電單車DIY的瘋狂程度，並不是洗車、換燈膽，為咗幫自己架愛車扮靚，親手改造出1架唔會同人撞款嘅電單車，他居然辭咗設計師工作去學燒焊、燒油缸、車架、死氣喉等，由設計到製造一腳踢。你會話，想飲牛奶都唔使自己養隻牛，但為興趣，他覺得非常值得，問你服未！
記者：黃婉冰 攝影：周旭民
概念來自DiscoveryChannel啲鬼佬
女人貪靚，男人同樣貪靚，女人怕撞衫，男人揸車一樣怕撞款，好似Zevil咁，他愛Chopper的程度已毋庸置疑，只想不到他竟然為了擁有一架屬於自己設計款式的電單車，竟然走去跟朋友學燒焊，燒到連份工都放棄埋，希望可以親手做出自己喜歡的油缸。
「我自己本身都係做Design，以前改車會先設計好外形，再畫草圖搵人照住做，但喺香港要搵人肯幫你做都好難，就算有人肯幫你做，都未必完完全全做到心目中想要嘅嘢。我睇DiscoveryChannel見啲鬼佬都係自己燒油缸、噴油，咁啱我朋友David又係做燒焊，咪叫佢教我囉，舊年10月開始我跟佢學，邊做邊學，學咗2個月就幫朋友做第1個，由設計到完成用咗1個月時間，朋友諗住將佢裝喺架Softail度。」
「電單車燒焊要做得好，一定要肯放時間落去，初學時係朝早返工，夜晚落嚟學，後來我發覺咁樣都唔得，所以索性辭埋份Job，轉做Freelance，日日朝10晚7喺度邊學邊做。最初有諗過放棄，因為真係好辛苦，尤其是啱啱學燒嗰陣時，成日焊穿咗，想放棄嗰陣，我又會諗，點解人哋得我唔得？咁咪又繼續試囉。其實我都只係學得小部份，好多複雜嘢都未學，好似搧灰、噴油咁，𠵱家都仲係要由David做，遲啲我會學埋燒電單車車架，好似燒HandleBar，但關乎到安全問題，所以要慢慢學。」聽完Zevil的學藝生涯，我發覺他就同女人貪靚一樣，落重本擺時間走去學化妝，大家都是追求滿足感，俾人望多幾眼，只是將個靚的元素放在不同地方之嘛！
設計、燒焊一腳踢
燒製油缸最緊要有Concept
雖然我成日認為男人做到嘅嘢，女人一樣做到，但今次我唔認叻，因為我知道要用電鋸將塊8呎長、6呎闊嘅鋼板裁開確非易事，就連Zevil都話這是全個過程中最難的一Part，「除燒焊之外，最難嗰部份就係開料，即係用電鋸將鋼板裁開，尤其是要裁直線，好易Cut斜咗，咁樣做出嚟就唔靚。喺開始做之前，一定要諗好個概念，唔可以一路做一路諗，心目中有咗個設計，跟住先畫圖，畫圖時尺寸一定要非常準確，所以我覺得最好都係見過架車先，然後再設計，咁會準確啲。」
用女性胴體上闊下窄
未做訪問已急不及待叫Zevil即刻拎他的傑作出來公諸同好，只見他左手拎住個炭灰色，上闊下窄的物體，望真啲，原來這個又尖又起角，望落好有戰機Feel的油缸就是他幫朋友設計、打造的處女作，雖然這個油缸無咩名堂，但外形設計別有用心。「呢個設計概念係來自女人胴體，有呢個Concept係因為我想襯番成架電單車個外形，其實電單車設計者喺設計電單車時個概念都係來自女人，成架電單車個外形就好似女人嘅身形一樣，我用番呢個概念去做，外形線條就好似女性身形一樣，由上圍一路收腰到下身。」哦，唔怪得咁多男人都鍾意「騎」電單車啦，但以女人角度來看，這種身材，好似硬朗咗少少喎！
女人胴體
秘密改裝座駕
訪問前已知他早前換了車，買了1架2手「HarleySportster」，他說現正進行改車大計，將會自己操刀設計和燒製油缸、將HandleBar做成向外傾斜、燒過另一款頭尾沙板、將Seat位Low低、換埋條死氣喉……咦，大工程喎，有無少少睇住先呀？點知得來的答案：「我要保密，等到9月。」好叻咩，區區幾個月，你怕我等唔到？
