小初又再開口中，昨日先講完中國星（326）傳聞配股作收購酒店之用，隻股噚日即刻停牌，而奇就奇在小初周圍問，都冇人知道詳情。
不過，昨日又有消息傳出，話中國星擬收購的澳門酒店，就係金域酒店。小初記得，金域酒店好似係由永安旅遊（1189）持有，但永安旅遊股價近排唔覺有異動，諗落都覺得奇怪。永安旅遊昨日升1.35％，收0.75元，只得57.57萬元成交咁大把。
講起濠賭股，繼早排摩根大通搞過一次澳門概念股路演後，據講最新會輪到瑞信，喺今個月中會到新加坡推介澳門概念股，包括華人置業（127）、豐德麗（571）、英皇娛樂酒店（296）、遠東發展（035）、澳門實德（487），以及最新進軍澳門嘅浩基（628），但奇怪係參與的股份並唔包括兩隻龍頭股信德（242）同埋新濠（200）。
近期大市回軟，上述股份好多亦受影響股價回落，唔知今次佢哋出埠做路演會否對股價有幫助呢？
慕容小初