自從領匯房地產投資信託基金上市後，地產商一窩蜂跟風，個個都話要搞Reit，先有長實嘅泓富（808）同埋越秀嘅越房（405）上市，近期就有冠君產業（2778），其他地產商如新地（016）、恒地（012）、華置（127）同九倉（004）等，通通都話要搞。就連本身唔係上市公司嘅華懋集團，都話要分拆旗下一籃子商舖同商場，以Reit上市。
噚日華懋售樓部經理吳崇武澄清，坊間盛傳華懋將資產注入龔如心嘅安寧控股一事，佢話集團係籌劃緊Reit，計劃將5個商場同商舖注入，包括沙田希爾頓中心、上水名都、粉嶺名都、元朗好順福購物中心同埋屯門康麗花園，市值同樓面等資料欠奉，淨係講最大面積係10萬呎嘅粉嶺名都商場，租金每呎300蚊。
華懋都有唔少寫字樓，但就下一步先諗；上述房託最快年尾上市。雖然重未正式申請上市，但集團已將所有資料交咗畀投資銀行處理。