講起都覺得邪門，小初啱啱話儀征化纖（1033）傳聞私有化遲遲冇料到，昨日就見佢阿媽中石化（386）同埋上海石化（338）停牌，雖然唔知搞乜嘢，但儀征股價就受刺激，一度高見1.90元，收1.77元，升7.27％。
另外，近日炒到㷫烚烚的濠賭股，昨日失驚無神跌番晒落嚟，其中剛配股的新濠（200）跌5.88％，收20.80元，至於家姐主理嘅信德（242），亦跌2.75％，收10.80元。濠賭股龍頭下跌，澳門概念股氣氛變得麻麻地，但一樣有人急急腳往澳門投資。
買澳門酒店等錢用
經紀陳話，上周股價異動的中國星（326），發表公告話收購澳門一間酒店的控制性權益已訂立意向書，江湖上更傳單交易好快會落實。雖然中國星早排先至配股集資，但據講因為今次收購澳門酒店交易，會再次配股集資咁講。
中國星昨日微升1.3％，收0.39元，成交金額409萬元。
慕容小初