識玩大話骰、推骰、幸運骰、十五二十就學人蒲吧？No喇！𠵱家蒲吧淨係識以上拳腳兵器不足以挑戰靚靚女拳手，識玩埋呢期最興嘅「鬥地主」就差唔多嘞。走訪3間酒吧，真係間間吧都有人玩「鬥地主」劈酒！唔曉玩？學囉，畀啲Heart睇呢篇報道，世界盃前惡補定點玩先落吧睇波，咪無人笑你囉。
記者：曾冠輝 攝影：周旭文
玩法
鬥地主係3人玩嘅鋤大D，不過無「花」、無「夫佬」、出牌計點大唔計花大，兼多一對鬼。逐隻計，「大鬼」最大，其次「細鬼」，之後係2，最細係3，遊戲由「地主」開始輪流出牌，鬥快出晒牌為勝。盤口自定，一般玩法，輸家最少有半杯。
1.抽地主
洗牌，反開一張牌插入牌叠，順派3家，反開嗰張牌派到邊家邊家就做「地主」，你可以決定做唔做「地主」，做，攞埋中間派剩嗰3張牌，唔做，可以推庄，不過即刻罰飲。謹記另外兩家閒家同一陣線，只要地主贏唔出，兩家閒家都當贏。
2.單支
「單支」即單隻出牌，計點大唔計花，即梅花6同階磚6一樣大，打6仔，要出7你或以上嘅牌。
3.對牌、順對
出「對牌」又可以出「順對」，後者即順住點數嘅「對牌」可以一齊出，如4-5-6-7「順對」，打「順對」要有相同對數，即起碼要有5-6-7-8「順對」。
4.三條、順三條
出「三條」帶任何一張牌，「順三條」原理同「順對」一樣，如9-10-J「順三條」，可以帶任何3張牌一次過出。
5.蛇
蛇最少5隻，最多12隻，即由3連到A，打「蛇」原理同打「順對」一樣，同隻數先可以打，不過任何隻數嘅「蛇」都唔可以連2同「鬼」。
6.四條
「四條」俗稱「炸」，幾時都出得，即可打以上任何組合，一出「炸」，該局賭注即時Double（半杯變飲1杯），「炸」上「炸」再Double（1杯變飲2杯），餘此類推。
鬼
「鬼」俗稱「火箭」，有大細「鬼」之分，彩色Joker係「大鬼」，黑白Joker係「細鬼」，一對「鬼」同時出叫「火箭」，係「鬥地主」中最無敵，可以打包括「炸」嘅任何組合，出「火箭」，賭注同樣Double。
隨時反敗為勝
HappyHour落「X-Pub」，果然見到大班人圍埋「鬥地主」，以為人多唔玩得？錯喇，6個人分2隊玩Partner一樣掂！拳手Ivy話唔知邊個發明呢個遊戲，但認為「鬥地主」好玩在有得回氣，玩一鋪最少10分鐘，唔似大話骰嗌三兩板枚已經開盅飲到嘔：「做拳手乜枚都要識猜，『鬥地主』係啲客喺大陸學番嚟然後教我哋玩嘅。𠵱家好多客都撩我哋玩，唔識玩好Out！」玩Partner只不過係Part住飲酒，齋睇過癮咩？熟客William話：「睇Partner玩都好緊張㗎，因為隨時可以反敗為勝，未到最後一隻牌都唔知邊個贏。」（查詢：27300690）
拳手話
熟客話
喪劈一樣飲得甘
旺角警署對開酒吧街，星期六晚最多夜蒲一族，我求祈走訪一間「巴士站」，入門口昅昅，同樣見到好多客人手執啤牌左度右度，只得三兩枱玩緊骰盅，平時玩十五二十嗌到拆天嘅叫枚聲無晒，相反枱枱都3個人圍埋「鬥地主」，「炸」聲此起彼落，仲飲到成地酒樽，睇嚟玩「鬥地主」劈酒一樣可以劈得好甘。老闆娘Rainbow話：「都唔知點解突然咁多人玩喎，搞到我都要買定20副啤牌應付客人需要，又要洗牌又要派牌，初頭我都嫌煩嫌悶㗎，不過玩落又幾好玩，嫌劈得唔過癮？定大啲個盤口囉，基本飲1杯，『炸』Triple，『炸』上『炸』再Triple，一樣可以飲到嘔為止。」（查詢：23092232）
熟客話
老闆娘話
自訂盤口飲大佢
另一酒吧「太子酒廊」同樣「炸」聲震天，有人嫌「鬥地主」玩得耐唔利Sell酒，Bartender阿熾就唔係咁睇：「都可以飲得好激㗎，飲酒呢家嘢，盤口自定嘅啫，好多人客玩親都會一打一打啤酒咁Order，興起上嚟仲會飲芝華士溝綠茶，輸得急飲得甘，一樣可以好到頂。」（查詢：23911101）
熟客話
BarTender話
鍾意點鬥就點鬥
打機：早幾年機舖已經有「鬥地主」Game，長枕機舖嘅Ivan話：「玩咗N年喇，之前無乜人玩，呢期唔知點解好多人跟機爭住玩，不過打機玩法有啲唔同，有『夫佬』、『四條』連1隻，好難適應吓。」
上網：唔入機舖留喺屋企畀錢上網玩都得，登入到《Game淘》遊戲網站就可下載到《明星鬥地主》搵網上對手。（ http://www2.gametower.com.tw/）
手機：想隨時隨地鬥？可將遊戲下載到手機，《WaWa遊戲樂園》提供首30天試用版遊戲，有興趣不妨昅昅。
（ http://www.wawa.hk/）
猜埋低能枚
除咗「鬥地主」，𠵱家酒吧都興猜「黑白配」同「大細波」呢類齋考反應唔使用腦嘅枚，不過老實太低能嘞，除非媾女喇，如果唔係打死我都唔玩。
黑白配
雙方先喊：「黑白配，男仔女仔配！」然後猜包剪揼定輸贏，輸家擰頭，擰正贏家指嘅上下左右其中一個方向，即輸。唔明？請參考「旺旺」電視廣告中兩個小朋友嘅示範。
大細波
幾多人玩都得，圍圈，「大波」「細波」輪流嗌，但嗌枚要配合動作，嗌「大波」要做「細波」手勢，嗌「細波」就相反做「大波」手勢，完成手勢可隨意指圈中任何一人接枚，窒枚者輸。咪以為好易，幾杯落肚之後就唔係咁講！
反階級主義遊戲
「鬥地主」並非新玩意，聽遊戲名好有批鬥意味？無錯，農民先會鬥地主，呢個係中國舊社會版鋤大D。曾先生細細個已經玩過：「我哋細細個喺鄉下，個個都識玩『鬥地主』，嗰陣文化大革命，做地主嘅全部都無好下場，呢個遊戲由湖南農民所創，係一個反階級主義遊戲。」真係估唔到呢個遊戲背後埋藏咁深遠意義。
