4大會計師行之一嘅德勤，今個月1號搬竇，由上環永安中心搬去金鐘太古廣場1期及3期，其中1期做總部，噚日就安排畀記者參觀。
新辦公室合計總面積16.8萬方呎，比上環舊office多1萬呎左右，不過感覺就寬敞好多，話晒位處甲級寫字樓噃，係唔同啲嘅，聽講裝修都用咗幾千萬元，不過近年會計界咁好景，實賺得番。
德勤中國首席執行官鮑毅話，內地市場向好，但由於請人唔容易，所以對佢哋擴展內地業務有啲影響，德勤會睇定啲。而接生意方面都會較揀擇，盡可能做一啲跨國公司或大型國企，風險冇咁高。
德勤曾經係廣東科龍嘅核數師，搞到一身蟻，聽講仲俾中國證監會調查，鮑毅話經過呢件事學咗好多嘢，不過件事尚未了結，唔講得太多。