纖體美容生意響香港鬥到爛，紛紛轉戰祖國！現代美容拍埋上海麗晶健身，響上海開貝倚水療生活館，主席曾裕話，雙方夾埋出資1500萬，估約2年回本，仲搵埋蔡少芬做代言人，諗住今年底前響上海開5間……對家修身堂都殺入祖國喎，曾小姐話「摩登彪Ti」最大嘅對手係自己，揀舖梗唔會避開對家……咁又係，話晒有15年江湖地位，使乜迴避！
至於拍檔上海麗晶健身個底，點問都只係知道老闆姓楊名積錡，有10幾年房地產投資經驗，其他一概不詳；睇呢位大哥一身裝扮，闊間西裝X鮮黃大花呔X鮮紅底大白格恤衫，華華有理由相信，佢仲係一位極有時裝品味同潮流觸角嘅財俊，襯衫的功力分分鐘高過投資房地產嘅能力！