昨日666凶日，煲呔原本話6點見記者，唔知係咪怕邪，改遲一個鐘；結果聽完佢個記者會，《民主歌聲獻中華》單羅生門並無進展。煲呔喺雲南繼續否認有「參加」呢個活動，仲話自己係高官，如果有去冇理由傳媒冇報道，又話呢啲係無厘頭嘅指控。嘩，真係推銷員都有火噃。
華叔點回應呢？佢老人家話呢件事涉及誠信，絕非無厘頭，而當時傳媒焦點唔係邊個有去邊個冇去，事關人人都去！雙方各有說法，你話信邊個好呢？
咁八方當然發揮求真精神，打電話問記者C有冇猛料。點知佢個電話連響兩次都俾人馬上㩒熄咗，跟住仲打唔通㖭。吓，莫非佢見緊局長，抑或當八方係賣廣告叫人睇醫生？
搵唔到人問惟有靠自己。於是返屋企，摷番當年買落嗰套DVD，快速搜畫睇番當日個《民主歌聲》現場錄影，睇睇會唔會咁好彩在鏡頭一角發現一個十三歲嘅小朋友，同佢阿爸一齊聽梅艷芳姐姐唱歌。你話搵到呢格畫面，真係花紅都有得攞！點知睇到眼花花都只係睇到成龍啦、李克勤啦、譚校長同阿B哥哥……仲有做司儀嘅黃霑話忍咗好耐冇講不文嘢，又話作咗首歌叫中共放低啲槍；跟住睇兩睇又見到兩個司儀陳欣健同曾志偉，淨係見唔到煲呔。
貪睇明星闖禍？
正頭暈暈之際，電話忽然響起，原來係記者C。佢話唔係去見局長，只係同三個老友去馬會飲茶，嗰度唔開得手機啫。八方問佢班老友有乜料，佢話大家都關心羅生門事件，若然冇張相影到煲呔真係喺會場裏面，怕且都咬佢唔入，但大家好奇嘅係，煲呔自認嗰日去過馬場，見過華叔，係人都知嗰日搞緊《民主歌聲獻中華》，全香港又唔係冇地方食飯，為乜要去跑馬地？
記者C話佢三個老友，其中之一係熟悉煲呔嘅前港英餘孽，呢個餘孽話，煲呔有幾「精打細算」，全世界都知，「九成九佢想睇譚詠麟、梅艷芳，又見唔使畀錢買飛，咪走去睇免費show囉！」而個商界老友就話絕對信煲呔真係去食飯，「我估佢食完飯，順便走去八吓《民主歌聲獻中華》啩，點知撞到華叔，唔通喺嗰個時勢，話自己走嚟八卦咩？梗係死都話去支持民運！」
記者C自己就發揮創意，同煲呔作個理由，「嗰日跑馬地大塞車，煲呔喺車度人有三急，於是去馬會借廁所，咁啱俾華叔撞到，點知今日搞出個禍嚟！」
爆料熱線：29290000、27860099
報料傳真：26239278
報料電郵：[email protected]