曾蔭權從「孤獨」推銷員做到特首，成為香港呢個國際都會嘅「超級推銷員」，呢個香港奇迹係人都知，估唔到年薪近千萬，曾經夥拍特首成為「殺鱷3人組」嘅金管局總裁任志剛，都突然放低身段，做埋推銷員。果然係兄弟同心，其利斷金。
由人民銀行與金管局合辦的「金融基礎設施研討會」，噚日喺北京舉行，對住一班內地大銀行行長，香港嘅賣點就梗係快捷妥當、同步交收嘅即時支付結算系統，連致開幕辭嘅任總都話，或者「我都要改變一吓身份」，暫時做住推銷員，向內地金融機構，推介吓港元結算系統嘅3大特色，以及由任總話你知嘅4大建議。
噚日個研討會都算夠晒面子，工行同埋中行兩位行長──楊凱生及李禮輝都捧場，香港一大班賓架專程北上，包括3家發鈔行大班在內，連好少蒲頭嘅老闆級人馬，好似永亨銀行董事長兼行政總裁馮鈺斌，都有出席。