雖然市道好咗，大學生唔憂冇工做，但大機構除咗睇學歷，仲要睇資歷，有工作經驗當然有着數，對於剛畢業嘅尖子，想喺大集團打工，就要過五關斬六將。唔係講笑，噚日同藍籌收租股恒隆地產嘅執行董事吳士元傾開偈，佢話近排公司搞緊招聘，有成800個尖子申請，佢哋要過到4關，先有得入恒隆做見習生。
真身定槍手 第3關現形
第1關要答10條心理問題，目的係測試佢哋係咪嗰啲識玩辦公室政治嘅人，唔好以為恒隆主席陳啓宗鍾意議政，就會請啲「政治」意識強嘅員工，啱啱相反至真。咁冇乜邊個老闆想員工返工，淨係掛住玩辦公室政治，唔做正經嘢嘅。結果第1關800個申請人，篩剩百幾個。
第2關易過啲，只要喺網上交一篇文章，內容吳士元唔肯講，但就話「時間唔限，人物唔限」，即係你可以搵「槍手」。不過，吳士元話，入圍嘅仲要過第3關面試，係「真身」定搵「槍手」到時就一一現形。
一般嚟講過到第3關嘅，只係剩返幾丁人，佢哋可以同吳士元一齊食飯，摸摸底，亦即係第4關。吳士元話，呢個請人計劃今年踏入第3年，第1年請咗10個，舊年請咗5個，今年目標係請15個。咁辛苦入去做見習，月薪有幾多？
答案：1萬。
李華華
讀者如有任何意見或報料，歡迎發送電郵至[email protected]。