工廈租售價近年一直升，若果舊年入貨揸到家吓，轉新租約時，可以有唔錯嘅回報，好似觀塘有個工廈單位租出，相對舊年入貨價有成分息收，仲簽5年約，即係業主5年後就收番差唔多一半樓價。
個單位係興業街永泰中心13樓B室，約1萬方呎，據中原九龍東工商部營業經理伍錦倫話，有製衣公司以6.5萬承租，呎租約六個半，屬市價。業主喺舊年中用750萬入貨，今次租出，回報有成10.4厘，可以叠埋心水收租。
就算唔想長揸，以家吓永泰中心呎價過千蚊，若果呢位業主將單位放售，可以收番過千萬，即賺二百幾萬。
經濟持續向好，有時工廈租客都肯畀多少少，好似上水珍寶廣場地下全層近2.3萬方呎，據利嘉閣蔡鳴楚話，業主原叫呎租8蚊，但因有客爭，最後由一間汽車維修公司以呎租9蚊承咗。