西貢永隆路五塊田村屋地下單位，面積700呎，冇海景，冇入契大花園，又冇豪裝，總之就係冇乜特別，竟然賣到512萬，呎價7314蚊，直迫半山豪宅。
高信置業經理沈佑晉話，西貢區村屋以全幢賣比較值錢，最高試過6000幾蚊呎，分層過4000蚊已經好高價，7300蚊肯定係歷史新高，超越97年高峯。
個單位賣到咁貴，原來有段古，買家係外籍人士，喺兩個月前，以520萬買咗村屋樓上兩層複式，面積1400呎，呎價3714蚊，好正常。入住之後，佢好想買埋地下單位，全幢自住，樓下業主知道後，即時吊高嚟賣，冇500萬都唔肯賣，比市價高出1倍有多，買家唔知係咪非買不可，竟然追價追到512萬成交，只係比樓上複式平8萬蚊，呎價幾乎高1倍。
一個願打，一個願捱，就係咁促成呢宗超高成交。原業主賺到笑，佢喺96年12月以240萬買入，揸咗10年升值超過1倍，勁賺272萬離場。
電郵地址：[email protected]