MSN好快就會有新版！MSN香港區業務主管話，今個月內會upgrade到8.0版本，多啲個人化feature，佢話MSN族喺香港有成150多萬個活躍用家，人數仲多過hotmail嘅140萬。
廖創興銀行同MSN香港噚日搞個記者會，宣布全港首張網站聯營信用卡「MSN@VISA」，記招搵咗近排成為港聞焦點嘅商台DJ小儀做主持，唔知係咪咁，特別多傳媒捧場。
講番張卡，話明係聯營卡，點解張卡冇廖銀個名，只有MSN嘅蝴蝶標誌？原來要喺卡底先搵到。
一向保守踏實嘅廖銀，今年仲有樣創新舉動，就係同香港嘅外資財務公司合作，大搞私人貸款業務，但公布日期要等到第3季，合作方式可能係成立聯營公司，或者合作推出聯營產品，聽講廖銀會喺宣傳推廣方面落重本，投資近1億元。