向來《捉馬騮》大受玩家追捧，全因嗰班搞鬼到震嘅嗶波猴喺度作怪。咪睇佢一臉無知，實質蠱惑到飛起，所以咁多集都受歡迎。預定暑假出嘅新作《百萬猴軍勁爆大出擊》，成班馬騮軍團仲由奇幻世界闖入東京，為咗保衞和平，主角們惟有大動干戈，將搞事者一網打盡！
文：陳福榮
本作是《捉馬騮》系列06新作，跟過往比，最唔同係並非要捉晒300隻馬騮，而係阻止一開始就從天而降、成班着晒軍服嘅馬騮企圖侵佔地球！呢個系列最叻玩Crossover，可能之前《MGS3》搵過佢哋喺MiniGame客串，今次班馬騮仔全部着住軍服同玩家開片，當正自己仲同蛇叔搏鬥緊咁款，惹笑非常！
正邪視點講故事
玩家可選擇由男主角小翔與奸角斯貝達嘅立場嚟進行遊戲，前者就代表地球正義軍，將得到夥伴們如春香和夏美等人協助，等你可以較輕鬆咁保護地球，始終呢班馬騮絕對唔係善男信女。每名角色都有唔同專用武器，好似小翔係靠把雷射劍食糊，而夏美則係成個羅拉咁扮雙槍客。
相反玩奸角斯貝達就冇乜勁人幫拖；古仔講佢洞悉馬騮軍團有啲唔妥，為免妨礙佢統治世界嘅野心，於是將搞事嗰位「偽．斯貝達」解決！
場景真實夠過癮
過往《捉馬騮》只發生喺夢境般嘅國度，仲要借助電腦幫手先能從現實世界跳過去。不過呢隻《百萬猴》就唔同，幾個城市如東京、秋葉原同新宿等，都係依照真實場景嚟做，去過日本嘅朋友望見呢啲版圖，應該份外有親切感吧！單以新宿場景做例子，地鐵站南口環境同現實真係分別不大，玩起上嚟都幾好笑。
PROFILE
《百萬猴軍勁爆大出擊》
遊戲類型：動作
對應機種：PS2
遊玩人數：1至4人
開發廠商：SCE
推出日期：7月13日
