呢排相信大家都聽過吹得好行嘅風，就係原材料價格出現大幅回吐。金、銀、銅、鐵價全部都跌、跌、跌。相信大家都聽過：「原材料今年初升咁多，一定係泡沫。泡沫就一定會爆，咁𠵱家原材料價格跌咪即係泡沫爆緊？」
大家作為我fan屎都知道，孫柏文係原材料大好友，又點會咁快叫隻金手指「投降」。其實，金、銀、銅價真係出現回吐，仲要係回吐好多。不過喺原材料世界當中，金、銀、銅只係二、三線配角，真正女主角，一定係石油。呢排石油就好似坐冷板櫈一樣，完全喺大家投資者心目中淡化。呢個情況，我唔可以怪大家，日日睇報紙、聽電台、睇電視、上網，都係睇住花旗國牛仔總統同伊朗總統跳舞，仲要係跳啲平時要去蘭桂坊先至睇到嘅辣身舞，即係話，孫柏文就睇到好興奮，不過俾啲長者、傳媒睇到，就會話：「文明世界滅亡在即阿！」
原材料跌要睇原因
不過當好似冇乜嘢發生，得個「跳」字卻唔見有再進一步行動，冇「嘢」搞，相信大家都會睇到「麻木」。呢排石油市場，就真係好似「吽咗喺到」，不過「吽咗喺到」即係冇跌。去到呢度，又係時間玩「金手指Shibboleth」，問大家：「點解呢排好多原材料，好似金、銀、銅都跌，不過石油又冇跌呢？」
如果你答：「伊拉克核子問題！」咁我就要係櫃桶底，搵番我嗰塊鋪塵10年嘅「笑聲拍板」，拍番醒你。由2001年以嚟，原材料價格上升，都係因為原材料生產商喺90年代，差唔多完全冇投資增加產量。咁𠵱家國際需求用盡了可生產量，在供不應求之下，原材料價格就節節上升。仲有，鐵礦、油井等一經開發，可生產量就會開始下跌，就算有新增鐵礦同油井，都要彌補冇咗嘅可生產量，先至可以發大全球總可生產量。
所以，睇原材料股，就一定要睇吓隻原材料原有可生產量下跌嘅情況。其實，呢排油價非常硬淨，就係呢個情況。大家可能會問：「咁究竟邊度有石油生產量下跌嘅情況先？唔好老點喎！生產量跌，唔係已經喺預期之內咩？點解有個地方生產量下跌會係預期之外㗎？」問得好！大家都知道石油係有限資源，石油生產量下跌，真係應該喺預期之內。不過，有一個例外，就係自稱為「世界石油中央銀行」嘅沙地阿拉伯。叫得自己做「中央銀行」，即係等如有收放自如嘅能力，咁試問，花旗國聯邦儲備局係唔係應該有完全收放美金嘅能力？
油國產量是虛是實
如果我再問大家，我同你講話聯儲局印美鈔部機，好似印唔到聯儲局想要嘅數量，咁你會唔會覺得仲係「預期之內」呢？沙地阿拉伯一向以嚟都話，可以每日生產1050萬桶石油，不過生產950萬桶，預留100萬桶生產量嘅空間。有好多非主流（包括我在內）嘅分析員，一路以來都覺得，其實沙地阿拉伯根本只可以每日生產950萬桶石油嘅生產量。仲要因為好似冇乜新油田，950萬桶石油生產量都岌岌可危。
咁沙地阿拉伯，喺4月嘅時候，就每日只生產910萬桶石油。佢哋嘅石油部長話係因為全球好多煉油廠正在維修當中，所以對原油需求下降。如果真係好似佢咁講，原油價格就會下跌，提煉毛利應該上升，不過孫柏文完全睇唔到。如果沙地阿拉伯嘅石油可生產量真係繼續跌，咁就恭喜買咗能源股既《金手指》fan屎。
最後，小弟聽日休息一天，我亦徇眾要求，搵咗《利字當頭》一欄嘅總舵主利世民兄，幫小弟代筆一天。佢話搵到人幫佢湊BB女，所以應該可以全力出擊，我都好期待見到我哋特區土產嘅「超級撒亞人」復出！
孫柏文