Miki（楊愛瑾）有情當飯食，問佢中環有乜好嘢食介紹，佢就帶小記去咗兩間動之以情的餐廳，一間人情味濃，食到Miki同老闆娘都咁開心，一間裝潢典雅，坐落夠Warm咁話。計我話睇住Miki食得咁開心，秀色可餐飲水都飽。睇吓呢一轉要情陷中環新食力。
記者︰劉昱蘭
攝影︰伍慶泉
溫情小店
能夠成為Miki的飯堂，唔係有5星級大廚坐鎮的大餐廳，或者貼滿報紙雜誌推介的人氣長龍店，而係老闆同客人可以Share秘密、關係密切嘅心思小店，最緊要係畀到Miki一種返屋企嘅感覺。「有時同啲Friends落嚟食飯，連埋老闆（Vincent）同老闆娘（C.Poon）就好似同全間舖的人都好熟咁，好Relax。一向我都唔飲Wine，但我喺度夠膽夠放飲白酒，我第一支白酒都係喺呢度開。」
神秘Party「喎」晒
可以識到老闆們成為朋友，全靠同事有一次問Miki介唔介意同佢啲Friend一齊食飯，於是識咗成班有老有嫩嘅朋友外，仲發現老闆們非常啱Key，自此之後有乜秘密行動都搵佢哋幫手。「有次同個朋友搞SurpriseBirthdayParty，我從來都唔做搞手，一要搞就梗係要有驚喜，Call咗一大班Friends踏正12點到，同老闆講定晒幫手守秘密，點知俾支酒累事，我喺8點開始食飯飲白酒，個Friend11點就貓咗，不過，好彩佢醉咗唔知個神秘Party衰咗，因為其他Friends前後腳咁嚟，唔係一齊出現冇氣氛啦。」
主打歐陸Fusion
留得住Miki，除咗人情，當然唔少得食物。開業半年多嘅SUP1，主打歐陸Fusion菜，特色食品只此一家，老闆Vincent話Fusion都有分幾種，一個Dish入面有多種國家特色嘅係Fusion，一間餐廳內食到唔同款多國美食又係Fusion，佢哋就係後者，而且Fusion菜一開始都係咁樣玩。
白汁芝士炒黃金菇配多士（$68）
每次Miki嚟到，乜Order都未落，老闆就會自動自覺先上呢個Miki必食嘅多士。多士先用橄欖油同黑楜椒焗過，個汁係忌廉加意大利芝士整成，香脆好味。
香煎法國鵝肝配蜜糖風乾梨（$78）
加埋風乾嘅雪梨一齊食，雪梨上面又掃咗蜜糖，梨嘅酸甜同鵝肝嘅甘味混和，所以Miki要連埋麵包3樣嘢一齊食，咁就香脆、鬆軟、甘味、酸甜一口嚐。
泰式辣汁炒龍蝦意粉（$180）
有秘製辣汁同香草金不換一齊炒，非常惹味香口，個辣味一路留喺個口都唔走。
SUP1
地址︰中環歌賦街11號地下
電話︰25225002
至Warm意大利名氣
香港西菜名廚MrHarlanGoldstein，繼ifc的歐陸餐廳之後，最近又開咗間意大利餐廳。兩間去勻晒嘅Miki，就係鍾意新餐廳竟然做到一種舊舊嘅歷史感，又係畀到佢好Warm嘅感覺。睇嚟Miki係一個多情種，去邊度都要溫情行頭。
「ifc嗰邊嘅裝潢好Modern，加埋個海景好Grand，但呢度好特別，牆身專登髹到唔均勻，加埋個柚木地板，好似經歷過一段時間咁，就係咁先夠古典夠Warm，我都係鍾意呢啲親切嘅感覺多啲。」
行勻全國搵食材
有水準係有代價，開業前Harlan同大廚AlbertoBoccelli用咗差唔多2個月時間，行勻成個意大利，由食材重地有山有海又有出名紅酒嘅Tuscany，到米蘭、西西里等地方，找尋最佳嘅供應商，連雞蛋、檸檬、番茄等普遍材料，都唔會用香港本地貨，務求做到最地道嘅風味，有幾多間餐廳，肯畀咁多時間咁多本錢做到咁完美？
至謙大廚跟你學嘢
來自米蘭嘅大廚AlbertoBoccelli入廚20年，去過瑞士、英國、美國等地工作，接待過唔少名氣巨人，如伊利沙伯女皇、名歌星MariahCarey等，唔好以為佢淨係珍惜同猛人傾偈學嘢嘅機會，佢每日喺餐廳，一有時間就出嚟同啲客人密斟，因為佢覺得「Ilearneverydayfromeverybody.」尤其係佢第一次喺亞洲人背景濃厚嘅地方工作，覺得每日摸索東方人口味嘅Research好得意好新鮮。
西西里檸檬香草焗羊架 （$290）
西西里檸檬（Sorrento）夠厚皮有檸香，用佢嘅皮加埋香荽去咗羊嘅膻味，腍身嘅羊肉最啱食。
龍蝦意粉配拿玻里番茄汁（$298）
扁身橢圓形嘅Napoli番茄，做出甜甜嘅茄汁，冇一般茄汁咁酸，食落好特別。
意式咖啡軟芝士Tiramisu（$98）
呢個Tiramisu好特別，加咗栗子茸同原粒栗子喺底，除咗手指餅浸過咖啡水，個蛋糕仲加咗咖啡酒同杏仁酒，咁樣配搭好少見。
TUSCANYbyH
地址︰中環蘭桂坊15-16號協興大廈地下A及B舖
電話︰25229798