立法會主席范徐麗泰平時好少開金口，因為要保持主席嘅威嚴同公正形象，不過，遇到學生哥，就易話為得多。范太最近接受珠海書院新傳系訪問，講吓佢前半生嘅得失。
范太話，佢一直對當年因從政冇時間陪家人感到好慚愧，所以𠵱家佢會盡量抽時間陪佢哋，做兒女嘅黃大仙，有求必應，因為佢發現人生最重要係家庭，而唔係事業。
而自從丈夫去世後，范太𠵱家同婆婆以及小姑住，三人平均年齡係七十歲，閒時喺家中睇電視、睇書同上網就已經好開心。
范太又盡爆心中情，話佢人生嘅最低潮係個女患病要動手術，而政治上嘅最低潮係回歸前後，即係九四至九八年，當時做乜市民都唔認同，傳媒報道就愈描愈黑，佢簡直冇晒辦法，都唔知點算好。
好彩後來范太諗通咗，與其改變唔到別人，不如做好自己主席嘅工作，改善自己嘅弱點，幫助別人，做到問心冇愧就算。
范太嘅策略睇嚟係正確，因為後嚟市民同議員都開始接受佢，對佢嘅評論亦變得正面，佢仲循直選連任成功㖭。
傳真︰2623-9278
電郵︰[email protected]