港股第2日反彈，恒指升逾100點，重上萬六大關，但成交再縮，只得315億元。現時大多數股民都認為市勢只係大跌後嘅反彈，之後會再尋底，所以都持觀望，等機會才再入市。
恒指收16016，已略為升破小雙底嘅頸線（16006），若在此水平整固後再上，以量度升幅計，恒指上升目標係16400，但50日線在16330水平，相信會有阻力。
噚日同芬佬傾開，佢哋話上周四嘅低位15606，好有可能係底，但都要等個市反彈完再落幾多，先可以確定。由於市場資金並冇流走，市底仍然好實淨，下一次若果跌唔落，就要作好準備，買番貨。
內地地產股全面上揚，有大行推介嘅中國海外（688），曾經威過一陣，最高搶上5.40元，大升13%，但有大盤趁高出貨，結果低收4.975元，但仍有0.20元進賬，成交5600多萬股，大增1倍，好淡撼得好激烈。
華潤置地（1109）就追落後，高收4.325元，升6.8%，短線仲有得諗，升破20日線（4.44元）同100日線（4.495元），可向5元水平推進。至於最勁嘅係雅居樂（3383），最高5.75元，收5.55元，升8.8%，呢隻股貨源已大部份落在基金手中，後市仲可睇好。
接單滿瀉前景樂觀
上海集優（2345）4月底上市，曾高成3.30元，5月成個月，股價就反覆回落到2.40元才反彈，形成小圓底，噚日走勢已轉強，若確認升破2.80元阻力，短線上升目標係3.20元。
集優H股發行7.59億股（連同超額配售之數），上市後的7個交易日，已成交共12億股，再經過5月大半個月嘅低位收集，貨源9成9已歸晒邊，大戶隨時會開車。
除社保基金揸住H股7%外，其他3大基金夾埋亦揸咗30%，包括CWBankofAUS13.01%、TheCapitalGroup10.07%同摩根大通6.96%，仲有其他揸唔夠5%嘅冇計。
集優係上海電氣總公司旗下，專門生產電機組件及工業用具嘅子公司，受惠內地經濟高增長，接單滿瀉，盈利支柱的葉片製造業務，已接到明年交付的海外定單，而緊固件業務更接滿08年的定單，未來兩年盈利繼續會有高增長。
郭兆誠