鷹君分拆嘅冠君產業，一上市就潛水，搞到房地產投資信託基金神話破滅，連原本興烚烚搞緊上市、由大藍籌恒基地產分拆出嚟嘅陽光房產，亦要延遲上市計劃，鷹君副主席羅嘉瑞成為眾矢之的。
其實羅醫生為冠君花咗唔少心血，佢同華華講，近幾個月去世界各地做推介好難頂，因為年紀大咗唔係咁易適應時差。咪以為冠君上咗市，羅醫生就有覺好瞓，今個星期五世界盃開鑼，羅醫生又要捱眼瞓，但佢唔係球迷，只不過係廿四孝老竇，陪乖仔睇通宵波。華華問佢捧邊隊，佢都話要問個仔。
噚日除咗羅嘉瑞旗下嘅鷹君開股東會，咁啱佢細佬羅康瑞檔瑞安房地產又做路演，問羅醫生佢會唔會支持吓細佬撐吓場，點知羅醫生只係笑笑口唔回應。