噚日唐唐出席立法會財經事務委員會會議，眾多議員都爭相趁機為本港低收入家庭謀幸福，話要政府協助佢哋脫貧。王國興話，呢班低收入家庭最值得敬重，因為佢哋自力更生，寧可勤力啲都唔領取綜援；對此唐英年都贊同，話呢班唔領綜援嘅低收入家庭應該受到尊敬。此話一出，卻令另一位勞工界議員李卓人唔滿意，因為咁即係話領綜援嗰班人唔值得尊重，佢話應該鼓勵人攞綜援先啱，因為呢啲家庭月入唔到4000蚊，根本養唔起一頭家，對仔女有影響，甚至造成家庭悲劇。
唐唐即刻還擊，話李卓人「明屈」，佢冇講過領綜援嘅人唔值得尊敬，佢強調政府會繼續為有需要嘅弱勢社群提供綜援，畀佢哋可以過有尊嚴嘅生活。田北俊又加入舌戰，話應該鼓勵人搵工，好過鼓勵人領綜援。
傳真︰2623-9278
電郵︰[email protected]