在對沖基金焗住炒的情況下，內地房地產股噚日走勢如過山車，只是未出現單日轉向的利淡訊號。據黑客話，睇盤路似乎係有芬佬想散貨，短期或會再將房地產股再炒高，引誘散戶接火棒。
中國海外（688）股價一度被推高至5.40元，升達13%，但尾段沽盤排山倒海而來，令股價插至全日低位4.975元收市，升幅收窄至4.2%，意味噚日入市接貨者，差不多都要損手收場，平均蝕3.85%。另一隻合生（754）一度升5.3%至19.95元，最終又以全日低位19.10元收市，升幅收窄至0.8%。以該股昨日平均成交價19.344元計，追入的股民平均蝕1.28%。
中國人壽（2628）再升4.3%至12.20元，成交達12.5億元。平保（2318）亦升逾3%。Cookie話，保險股上升主要是投資者炒佢哋認購中行（3988）獲利。其實中國人壽只係獲配3.94億股中行，賬面現時賺約2.36億元，照計不足以支持股價升逾4%咁厲害，但日後仲有好多筍嘢跟住上市，例如工行、農行等，估計國壽都有份獲得大額配售，因此佢嘅投資者地位變得好超然，投資價值當然要被重新估計啦。
港交所（388）玩拆細，但唔係拆細股價，而係拆細每手買賣單位，由2000股改為500股，市場對呢種拆細消息一樣受落，股價炒高5%，收55.55元。
晶門低處未算低
晶片設計商晶門科技（2878）近日遭一眾證券商唱淡，估計佢嘅手機晶片業務邊際利潤受壓，導致股價連日下跌，噚日更一度失守去年8月底位2.10元，低見2.025元，收2.20元，跌12%。
i師傅話，基金噚日大手出貨，有洗倉迹象，相信2元關口難以守穩，下一站1.75元，即招股價水平。
阿虎