6月4日的青衣城商場，一隊又一隊街頭足球隊展開連場激戰，在迷你T-Futsal人工草皮5人足球場內，腳下定生死。連串的轟轟轟巨響來自減少了反彈力的特製足球撞上圍牆再反彈，入球！出局！換衫！就在最後的20分鐘，出現3個街頭少年連贏8場，從SMS取得消息到參加比賽短至只1小時，卻就老中青無人能敵！然後是由戴夢夢領軍的新組合夢幻明星女子足球隊落場，嘩！腳法手法都咁得。迷你足球勢將顛倒眾生可以預見！
記者：馮敏兒 攝影：楊錦文
戴夢夢21歲
足球歷：師承KK張國強學咗2個月，帶頭搞女子明星足球隊的目的是發起女子足球運動，開開心心去籌錢做慈善，打破男人壟斷局面。入波心經係靠運氣！
最愛球星：費高，力捧西班牙。
陳苑淇（Jolie）23歲
足球歷：冇乜。5呎8吋身高＋42吋長腿叫做有啲優勢，可惜自覺細場難踢，理由是手腳太長，龍門太細。
最愛球星：巴治奧，力捧巴西。
鄧穎芝（Vangie）21歲
足球歷：F.3就已經受同學影響學踢波，但因為覺得太辛苦而放棄，但就一直都有打籃球，狀態至Fit。
最愛球星：朗拿甸奴，力捧巴西。
梁靖琪（Toby）23歲
足球歷：因好友係晨曦隊球員，情不自禁下染上波癮，最後經受不起夢夢的引誘而歸隊，練的應該是旁門「阻」道。
最愛球星：朗拿甸奴，力捧巴西。
新城DJ車車21歲
足球歷：98年開始睇波，真正踢波幾個月，扯衫推撞有一手，為睇靚仔而睇波。
最愛球星：朗尼，力捧英格蘭。
細哨都踢Futsal出身
日本涉谷時興情侶波雙雙對對4對4，浪漫8人組走埋就開波；更有關西、關東聯賽，參與Futsal5人足球玩意的總人口有成2,000萬人，香港足足遲了10年，難怪今年亞洲5人足球聯賽的港隊雖然入了決賽，但還是給日本狂掃10比0！好波靚仔球員范俊業話：「當然喇！佢哋有錢請巴西同佢哋打熱身賽。」瞓身推動T-Futsal5人足球的科化足球學校的總教練鄺Sir更說：「香港有絕對條件推動，因為有大量商場和室內用地可供流動的T-Futsal利用和轉化。當年的朗拿甸奴和球王比利都是踢Futsal出身，朗拿甸奴更是因為打Futsal出色而被發掘；近幾年在英國亦大為流行。」
夢幻女足大勝6:2
咁Hit，食住個勢剛剛組成兼初登球場的女子明星足球隊5人組，當日趁早兩輪的比賽人去場空之際，竟不問自取，強搶個場來練波！啱啱遇着剛剛，路見不平的香港甲級足球先生們行過，羅繼華就說：「真睇唔慣女仔踢足球！」其他成員包括范俊業、岑國培、馬嘉祺和足球王主持Colin亦對這群橫蠻女子眼超超，一言不順，大戰一觸即發！
15分鐘的賽事在尖叫聲和汗水中完成，賽果是6比2，在數百位圍觀的路人甲和靚女「粉絲」的見證和吶喊下，初出茅廬的女子明星足球隊大勝甲組5將，應驗了伍晃榮的名言﹕「波係圓嘅，未到最後一刻，都唔知會發生乜嘢事！」
美女足球隊不傳腳法
明星女足勝利解碼
Q：聽說妳們又打人，又扯衫，又搣人，又出指甲插人喎？
A：「是他們球技不如人就出言抵賴！要不得！」
Q：妳們點睇香港的甲級球員，其實得唔得㗎？
A：（異口同聲）：「他們有進步的空間，要繼續努力，都踢得幾好，不過要學多幾年！我哋有天份係冇得羨慕㗎喇！」
Q：妳們有冇練習㗎？
A：「我們經常約埋一齊去Jolie屋企個足球場練習──在電視裏面囉。」
Q：妳們知唔知5人足球的規矩？
A：「回傳時龍門唔可以用手接當然知啦，不過在必要時我們都手足並用……嘻嘻！」
Q：我聽到妳們尖叫？
A：「打T-Futsal最得人驚就係個波射落圍板時，會好大聲㗎，嘩，如果射落個身度仲得了，所以咪尖叫定先囉！」
Q：下一步會點？
A：「我們將會踢其他靚女入會發展：包括林苑、唐寧，還有外援禾田裕美……嘻！」
足球小將最搶
當日除了一班大細路在首次亮相的T-Futsal上「搞鬼搗亂」外，真正享受球場的其實是這群8歲以下的足球精英，他們全是甲組球星的高徒，連他們的老師都讚他們非常厲害。同場還有由吳日言、楊愛瑾及方力申組成的「名人明星隊」晒腳法。
地鐵商場「T-FutsalBattle」日程
地鐵商場「T-FutsalBattle」嚟緊分別在杏花新城（11日）、青衣城（18日）和德福廣場（25日）再次舉行，時間是下午1時至5時。內容包括「T-Futsal跟隊擂台挑戰賽」、不同明星出場對壘的「名人明星挑戰賽」和「夢想成真足球訓練班」，費用全免。
巾幗「球」知
最迷人的女子足球員
世界上最靚仔球星有碧咸，同樣最美艷靚女球星亦有美蘭妮MileneDomingues，正是大哨朗拿度的前妻是也。99年既是足球員又是名模的她與朗拿度在香港邂逅，旋即結婚生仔，03年9月更被選為巴西女子國家隊出戰女子世界盃，但她一直是後備而未有出場，亦被隊友指她被帶到世界盃只是一種噱頭，是年底她與朗拿度亦宣布離婚收場。不過美艷的她目前仍然是女子足球運動員顛球（剔波）世界紀錄保持者。
世界足球小姐
要講女子足球，就唔可以唔知中國乃女子足球強國，91年第一屆女足世界盃就是在中國舉行，99年第三屆女足世界盃中，中國隊還只是在加時後互射12碼中，以一球之差敗給美國而屈居亞軍。但與此同時，我們也出了一個女足英雌孫雯，她取得了是屆的「金球獎」和「金靴獎」最佳射手，更在00年被世界足聯授與「世界足球小姐」的美譽。
