「就算逃到天涯海角，也要把他緝拿歸案」呢句說話，就係當年朱鎔基總理要捉潛逃加拿大「走私王」賴昌星嘅誓言。咁𠵱家朱總理都已經落咗台，賴昌星都仲係喺加拿大，所以如果大家想睇到呢個誓言履行，就要有耐性。希望唔好好似花旗國總統甘迺廸對付古巴卡斯特羅咁，一等就等40幾年。大家可能會覺得怪，我哋中華人民共和國政府誓要捉嘅一個小小走私客，糾纏咗咁多年，都未捉到。其實，真係要讚吓代表賴昌星嘅加拿大律師。
呢個律師，絕對係有當年中英會談時候，眼見港幣狂瀉諗計止屙嗰班殖民地香港官員。當時，呢班官員只有一個任務，就係保護市民對一個貨幣嘅信心。如果淨係對住大家話「唔使驚」，「因為殖民地經濟結構健全、外幣儲備充足……」我哋作為機警嘅香港人，就一定會睬佢都儍，將手頭上嘅港幣，賣咗先算。
貨幣信心
有見及此，呢班官員為求達到佢哋嘅目的，就一定要將市民對一個貨幣嘅信心，唔用普通（即係同你哋講「經濟健全」、「儲備充足」等等）嘅方法維護。所以，佢哋就諗到同美金掛鈎呢條好橋。港幣一同美金掛鈎，大家擔心嘅已經唔係究竟「殖民地經濟是否健全」或者「港英政府儲備是否充足」，而係「你究竟信唔信美金先？」所以唔好話「掛鈎」呢招唔勁。
大家可能會問：「咁實行咗好多年嘅聯繫滙率，關賴昌星『返唔到屋企』，滯留加拿大乜嘢事？」問得好！賴昌星究竟應唔應該被加拿大政府遣返大陸，其實應該係個簡單嘅問題。如果有個人，喺國家A境內犯事走私，走咗去國家B嗰度，咁國家B如果捉到呢個人，就將佢遣返國家A。
代表賴昌星嘅加拿大律師，好嘢嘅地方，就係諗到千千萬萬個理由去上訴、上訴、再上訴。一時就話賴昌星返大陸唔會有公平審訊嘅機會，一時就話賴昌星返大陸會被虐待，最精采當然就係話賴昌星返大陸會被處死。「處死」呢樣嘢，就係祖國同花旗國最鍾意用來凸顯「強政勵治」嘅手法，咁加拿大就連喺隔籬嘅花旗國都唔驚，會驚一個越洋過海嘅政府咩？
掛鈎絕橋
正當代表賴昌星嘅律師，係咁搵唔同理由上訴嘅時候，仲要話未用盡加拿大司法制度嘅上訴機制之前，就算加拿大外交行政機關受盡壓力，都唔可以將賴昌星遣返。其實已經偷偷哋，將「賴昌星應否被遣返？」呢個問題，由「加拿大應否遣返走私客？」演變成為「加拿大司法制度是否獨立於行政機關？」將「遣返問題」同「司法獨立」掛鈎。
甚至可以講話，賴昌星一日未被遣返，就證明加拿大司法制度係獨立嘅。所以呢個律師仲唔勁？大家如果有加拿大嘅親朋戚友，可以叫佢哋幫你做個實驗，就係叫佢哋問吓本地人兩個問題，第一「潛逃加拿大嘅走私客，應唔應該被遣返？」我相信答案一定係「應該！」不過如果佢哋繼續問第二個問題「加拿大司法制度應唔應該獨立？不過，如果獨立個走私客就冇得遣返。」我亦相信答案一定係「咁唔遣返囉！」今日，孫柏文希望大家都可用我個隻金手指為大家篤出來嘅「掛鈎」絕橋。
孫柏文