陳豪昨日出席無綫活動，被問到可覺得在劇集《火舞黃沙》中，被經常裸露上身的黃德斌搶去風頭，陳豪就大讚對方天生冇肥膏，骨肉分布均勻。與黃德斌傳緋聞的邵美琪就出面撐緋聞男友說：「你好似喺度形容緊神戶牛柳咁！」
陳豪、邵美琪、黎姿及鄭嘉穎昨日在將軍澳電視廣播城，為有份主演的無綫新劇《通天幹探》進行開廠拜神儀式，祈求拍攝順利。
陳豪日前拍攝了一場非常逼真的火警場面，他表示非常滿意效果，他說：「第一次搽到成身防火膏，不過效果真係好逼真，公司都有幫我買保險，而我本身都有買醫療保險。」
「我都唔介意露」
提到劇集《火舞黃沙》的收視未如理想，惟獨劇中經常裸露上身的黃德斌成功突圍，陳豪被問到可會覺得被搶去風頭時說：「佢天生冇肥膏，唔使點操，我哋男人見到佢除衫都自然望多幾眼，佢嘅骨肉分布真係好均勻。如果有人搵我做代言人嘅話，我都唔介意露。」
此時，與黃德斌傳緋聞的邵美琪即搭嘴說：「你好似喺度形容緊神戶牛柳咁，你同佢都正嘅。」陳豪就自嘲頂多是一塊西冷扒或肉眼扒而已。
黎姿唔認扭計
黎姿近日被雜誌指不滿公司沒有安排她參與《女兒紅》大碟而「扭計」，要求換經理人，她昨日說：「係雜誌講定係公司講？最好你哋問番公司我係咪扭計，我對於𠵱家嘅工作好滿意，你哋唔好撩啦！」
採訪：卓美娟 攝影：葉君海
