工廈炒炒吓都維持咗一、兩年，到家吓仲有好多人玩緊，始終市場仍然有一定需求，而銀碼唔算特別大，有啲買家亦不惜以新高呎價入貨。
好似最近觀塘巧明街世達中心高層A同B室，由同一買家合共用900萬掃入做長線投資。A單位1848方呎，呎價1800；B單位2799方呎，連313方呎天台，呎價2000。呢個價位已經係世達中心近期新高，上次成交呎價都係講緊1750。聽聞市場憧憬附近南聯嘅發展項目落成後，將會帶旺個市，所以最近有唔少投資者喺附近入貨，仲話要係睇中長線。
另外，小西灣新業街八號商業廣場，高層6700方呎單位，以呎價1300易手，成交價871萬。據中原地產講，呢幢物業係區內唯一可作工業或商貿用途大廈，成交個案比較少，要追溯到4個月前，呎價都係1300。由於貨源少，最近已經有中層單位業主以呎價1500放盤。