電腦FPS歷史中不可多得嘅名作《半條命》（HALF-LIFE），冇佢個遊戲Engine就唔會有影響極深遠嘅改版《CounterStrike》出現，加上向來重視圖像引擎表現能力，令呢個系列每集新作都備受注目。續集學人大搞外傳三部曲，頭炮亦啱啱出咗，估唔到出咗咁多年都仲有新點子俾佢諗到，Fans呢勻想唔科水都唔得。
文：陳福榮
《HALF-LIFE2:EpisodeOne》打正第1章旗號降臨，即係話唔止出1隻就算，廠方打算連出3集，續作已經排好期等年尾推出，至於最終章則係出年年中。雖然故事屬外傳，但咪以為如一般PCGame咁要用原本隻碟嚟安裝嘅資料碟，佢確實係完完全全獨立咗出嚟發售，冇玩過原本嗰隻都冇所謂，你當佢係單機作品咁玩就得喇。故事方面，講述擁有超強火力嘅四眼佬主角Gordon，喺執行任務期間被困於周圍都係喪屍同異形嘅City17入面，為咗逃亡惟有同女伴Alyx齊心合力衝出重圍。
小組剿敵勁過癮
如果話以往《半條命》係1匹狼嘅冒險歷程，咁外傳就肯定不愁寂寞，皆因有成團人好似《R6》咁俾你指揮，你可專心去殺敵同解謎。呢種系統既有小隊優點、但冇操控成班人嗰種麻煩，直頭要拍爛手掌！秉承系列過往重視嘅解謎要素，要啟動機關食吓腦至過到版，今集仲玩多一瓣要兼顧埋其他隊員安危，當然近乎打不死嘅同伴Alyx反而保護番你轉頭，都算幾搞笑。
重視古仔更投入
只要家中電腦嘅顯示卡同音效卡有番咁上下級數，就可盡情享受遊戲超班畫面同臨場感靚聲，單論來自角色身上嘅實在感同周圍建築物嘅光源效果，已比同類作品優勝幾班，抵佢贏盡Fans歡心。但令筆者更表欣賞，就係佢肯扭下橋將原本幾硬派嘅玩法增添唔少「家用機式」要素，例如重視古仔及過場情節、做足配音等，不過或者係過度設定於外傳嘅身份有關，今集第1章僅得單人模式冇得連線上網，而且故事內容唔算太多，兩三下子就全部爆晒。唔想咁快無癮嘅話，玩番前作同人互抽可能過癮啲，不過忠實Fans又點會計較咁多吖。
PROFILE
遊戲類型：FPS
對應機種：PC
遊玩人數：1人
開發廠商：EA/Valve
