北京地方雖大，但有緣嘅話，都可以「千里相會」。上周南下香港主持中國銀行上市儀式嘅中行董事長肖鋼，與本地傳媒確實有緣，噚日由任總同王冬勝率領嘅訪京團，下午喺銀行學會舉行記者會，咁啱該會會址就喺中國證監會同一商廈內，就係咁，記者同前往中證監「溝通」嘅肖董有緣短聚。
話說噚日下午3時幾，當記者踏入富凱大廈，正與「路過」嘅中行行長助理朱民聊天之際，笑容燦爛嘅肖鋼就隨同大夥現身，當中亦包括中銀香港嘅高層。
很快 盡快
約1個小時後，肖鋼又再出現，好熱情咁同記者傾偈，佢承認嚟中證監「進行溝通」，有「關於A股，亦有關內地證券市場一些情況」，對於有傳中行最快本月底發行A股，佢好堅定咁話：「我們會很快、盡快上市A股。」但能不能上亦要睇東風──就係內地市場條件及中證監嘅批准。之後，肖鋼就在笑聲中被大夥人簇擁而去。