A：「星期日有出海船P，你去唔去？」
B：「唉，上次池邊party姣婆蓮竟然同我撞泳衣，同佢組Twins，我覺得cheap到痹囉！成8嚿水一套㗎，冇錢再買喇。」
A：「我都嫌自己套泳衣太清一色，不過睇極都唔啱。」
放心，DIY打救眾姊妹，今次請來名設計師Nelson教大家點樣整色整水，以三套平霸比堅尼，配襯BlingBling閃石、水晶或七彩膠珠，創出別樹一格水着時裝魅力，戰鬥力直線飆升，今年下水禮班餓狼仲唔睇到流晒口水咩！
記者：盧家蕙 攝影：陳陶鈞
服裝指導：NelsonCheung
Model：Julia&Silvia（Starzpeople）
錶飾贊助：LOKMANITALY
舢舨充炮艇
要令一件平平無奇的泳裝變得獨一無二，梗係唔少得各式各樣嘅濕碎配件，以下的加工物都係Nelson多年嚟喺深水埗專售服飾配件店舖那裏搜集得來的，有需要時佢就會擺出嚟晒冷，平均每套泳衣約花1小時改裝（因人而異），件件總數唔超過$200，但效果就好似成件名牌泳衣咁，掂！
DIY配件
泳衣
珠石花花
膠珠鏈
顏色珠仔
白色魅力
本身是件平價而又單調冇睇頭泳衣，經一番修飾後，即時躍升為高雅迷人泳裝，上身的水晶、下身的珠仔吊飾，皆有助分散視線。Nelson說：「今年極之流行白色泳裝，唔好睇佢白白淨淨，其實好蝦人着㗎，身材唔夠凹凸有致都咪亂試。」好似model咁嘅身材當然goodfit，不過加工後，長平公主都carry到，仲多幾分型格㖭。
配件
a. 純白三點式泳衣 $49.9
d. BlingBling閃石水晶鏈 $20/碼
e. 白色緞帶連珠仔吊飾 $20/碼
f. 白色紗布玫瑰花裝飾 $40/碼
Step
Top：01.頸繩綁蝴蝶結部份可以不須加工，用尺量度餘下長度，即正面看得見的部份，直接縫上玫瑰花紗布作點綴。
02.輪到胸前部份，以閃石水晶鏈在三角布邊圍一圈，用針線縫上。
Pants：03.下身部份比較簡單易縫，只須量度三角褲腰邊闊度，前前後後地繞上一整圈白色緞帶連珠仔吊飾並縫合，一件迷人泳裝便完成。
Tips
白色唔係人人着得到，一係身材好勁，一係就好平，好似Sammi咁就會着得好型喇。
橙黃嬌美熱情
鮮黃色的確好sharp，不過稍嫌單調，學Nelson話齋：「女仔通常有一大堆唔等使嘅珠仔鏈，可摷番晒出嚟砌落泳衣上面，慳番一筆。」重點係以一連串橙黃色珠鏈作裝飾，令身材平平嘅嬌軀更性感，啱晒青春活潑的甜姐兒。
配件
b. 鮮黃色比堅尼泳衣 $49.9
g. 橙黃色大玫瑰花 約$100
h. 橙色膠珠拼金色珠片頸鏈 約$50
i. 橙黃色木珠鏈 約$40
Step
Top：01.橙黃色珠片頸鏈按照頸帶長度剪出來，頭尾打好結，沿頸繩一粒粒縫上。剪出自覺最標致的一小串膠珠（大約3-4粒），於胸口中間位置作小點綴。
Pants：02.下身的三角褲釘上一排橙黃色木珠鏈，只釘前幅沿腰邊位。如果下身飾物睇起來已經好墜手，臀部位置則可免則免。
03.最後扣上大襟花，左右皆可，Nelson話：「一朵好喇！咪學汪阿姐咁掛兩朵太陽花喺心口！」
Tips
選購可任意扣上拆下的襟花，可隨意配襯之餘，清潔時都方便啲。
麖皮民族風情
褐色麖皮三點式，驟眼睇悶親人，用來DIY就最好不過！只須配上充滿民族色彩的珠仔和頸鏈，野性指數爆燈。Nelson：「民族feel人人都啱襯，唔似得喱士咁難carry。」猶如小野貓上身，全場至hot係你啦！
配件
c. 褐色麖皮三點式 $49.9
j. 民族feel紅褐色頸鏈1條 $40
k. 紅色及米黃色圓筒形木珠 $10/包（約8-10粒）
l. 棕金色長扁形膠珠 $10/包（約8-10粒）
Step
Top：01.今次唔玩頸繩，重點擺喺胸前2塊布上，以各式各樣膠、木珠，隨意地釘上，每邊大概用上30粒。注意唔好用死一款，Nelson所釘的紅色、棕色珠比例為3：7。
Pants： 02.下身唔使逐粒釘，一條頸鏈搞掂晒，要先度啱長度然後修剪頸鏈。
03.由於褲的中間部份（約5cm）唔使釘，頸鏈會垂下來，量度頸鏈時應預留長度。
Tips
頸鏈不需要緊貼腰圍縫上，中間部份唔釘，令頸鏈輕輕垂下，別有美感。
平買靚泳衣
話明係DIY，買套幾嚿水嘅泳衣改裝一定唔符合經濟原則，Nelson就話：「街邊好多賣幾十蚊一套嘅泳衣都OK㗎，睇你識唔識揀啫！」語畢即鏟入灣仔散貨場，佢仲話：「唔好睇小呢類cheapcheapoutlet，隨時執到筍嘢㗎！」
Nelson'sTips
後生女着乜都好睇，肥有肥着，瘦有瘦着，唔通着一件頭咩！被Nelson評為「娘爆」嘅泳裝，致命傷係上面嘅通花喱士，十足似着bra，記住顏色並唔係重點，pattern先緊要。
Nelson評語：豹紋
「野性豹女郎？Sorry，今個夏天冇你份，自己彈埋一邊罷啦！」
花花Pattern
「今年興花花，呢套比堅尼貼晒題，粉紅花花襯翠綠色樹葉，顏色夠搶又唔會太誇，唔使DIY都夠照喇！」
