噚日提過浸大為答謝永隆創辦人伍宜孫嘅私人基金，捐500萬畀佢哋，所以專登將個演講廳用伍博士個大名命名。噚日搞典禮，身為伍家長子嘅永隆董事長伍步高，率領老婆同細佬步謙到場，伍董兩公婆仲先後攞住部私人相機同人合照，心情好靚。
伍宜孫對盆景好有心得，69年出過一本《文農盆景》，之後俾人封做「盆聖」，浸會2個校園亦設有盆景廊。不過伍步高話，自己藝術修養有限，所以做唔成老竇接班人；佢講，爸爸成日都話做人做生意，同培植盆景一樣，都唔可以急進，呢句說話佢記到家吓。
藤條燘豬肉食唔少
伍步高有4個兄弟8個姊妹，佢話老竇唔理仔定女，細個邊個唔聽教，都一視同仁請食「藤條燘豬肉」，佢仲自爆「食」過唔少。
據華華所知，伍宜孫後生時好鍾意踢波，雖則伍步高對足球興趣唔大，但都遺傳唔少運動細胞，家吓周一至六都做45分鐘運動，星期日就行山，唔怪之得身體咁Fit啦。