中航興業（1110）旗下港龍航空搞重組，大大話話都傳咗年半有多，相關股份亦借呢個消息炒過好多轉，結果中航興業噚日終於連同國航（753）等多間關連公司齊齊停牌，據講重組已經傾掂晒。
經紀黃早排亦提過唔知點解中航興業走勢咁強勁。事後看，當時可能真係有春江鴨收到風都唔定。
不過，市場上消息多多,今次堅唔等於下次堅，有時都會收錯風，例如儀征化纖（1033）傳私有化，一樣由去年講到𠵱家，尤其係過年之時傳得最勁，但至今仍然無下文，而儀征的股價就由當時的2元樓上跌到昨日的1.65元，高位買入博私有化的捧場客，呢鋪輸得認真勁。
另外，喺大陸做煙草包裝嘅僑威控股（1201），噚日突然急升9.16%至3.575元，創出52周新高。經紀黃話，市場傳聞隻股可能有集資活動。
偉誠（2300）做捲煙包裝印刷，獲澳洲公司入股成為大股東，唔知僑威會否一樣有人睇中呢？
慕容小初