食正666，多得重拍的《凶兆》電影，無人記得的魔鬼密碼翻炒成功。去年六月六，邊有咁熱鬧。
副刊記者認真搞事，特登亂撥手機號碼，終於打通96663666號碼。機主當然不是撒旦托世，雖然手機有六個六，一向相安無事。訪問後生仔女，更加不避忌，表明鍾意搵個六月六號六點鐘出世的男伴。不知道六六年六月六日六點零六分出生的男女，情場是不是特別順遂。不過生於六六年，對比𡃁仔𡃁妹，已屬懷舊老餅，頭頂不見三個6，只有一個大M字，魅力即打六折，潮人卻步。
中國人迷信七月十四，對666玩玩吓，不會認真。拍中國鬼節的電影，比《凶兆》陰森很多。鬼仔扮撒旦之子，恐怖程度連神婆羅蘭也不如。年輕人玩碟仙會嚇親，睇《凶兆》始終華洋有別，投入感有限，習慣事事嬉戲甚至封巴士阿叔做偶像的搞鬼年輕人，分分鐘當笑片來睇。散場後，煙不離手的女生即刻蒲蘭桂坊湊鬼，只要對方臉相不是勁似撒旦替身小布殊總統，眉來眼去兩瓶紅酒落肚後，男方表示自己的護照有三個6，女方回應，可不湊巧哩，她的ICQ號碼是三個9耶。69兩頭鉤，撒旦之子緊隨達文西之後顛覆宗哲主流教派，潮流所及，鍾意在蘭桂坊「搵食」的鬼佬，也跟風改了名，對睇完恐怖片的𡃁妹猛落嘴頭，說自己有六分一意大利血統，祖傳名字正是Leonardo，中譯乾手淨腳，well，叫我做李安吧。