星期五紅色暴雨，本想留在辦公室叫外賣。餐廳R打電話嚟話是晚深夜飛去英國放假一個月兼睇世界盃，想臨走前見吓啲老友。於是冒着大雨，去到茶樓，餐廳R未到，佢位美國朋友就到咗。美國人係大學教授──太平洋大學商學院院長。好少人識呢間大學，睇NBA就或者知，前幾年呢間學校出咗一位NBA新秀第一選，MichaelOlowokandi，入咗洛杉磯快艇隊。因為呢一位球員，就有人認識UniversityofthePacific。可惜Olowokandi名大於實，喺NBA浮浮沉沉，今季打邊隊，左丁山都唔記得咯。
餐廳R殺到，大講世界盃，位美國朋友唔知我哋講乜。美國人只識美國體育，對世界大事所知不多，呢位美國人承認：「大部份美國人不知全球化為何物。」六月至七月初，美國人會關心棒球與NBA決賽，鬼知道世界盃足球在德國舉行咩，好多美國人唔知道美國隊打入世界盃㖭。
十年不見嘅籃球C居然出現，佢話已經在內地經營零售業務，但仍然好留意香港體育壇發展。左丁山問佢：「知唔知道南華降咗班呀？」籃球C話：「梗係知啦。南華足球一年要用四百萬港紙，降咗班，南華會慳番好多錢。」哦，原因就係咁簡單，冇錢就冇足球，有油王支持就有車路士，大家明白未！
餐廳R問邊一隊會贏世界盃？人人都話巴西，餐廳R話：「巴西後防太老，前鋒朗拿度不在狀態，掛住同模特兒玩，到球隊報到之時，身體超重，完全冇晒身形。我唔睇好巴西。」巴西唔掂就群雄盡起，英格蘭、荷蘭、阿根廷、法國、德國都有資格爭。世界球迷嘅捧場對象一定係以本國為第一，本國輸咗嘅話十居其九轉捧巴西。巴西出局，捧邊隊？餐廳R捧英格蘭，因為香港嘅英格蘭擁躉多，○二年嗰屆，英格蘭一路贏，酒吧生意一路旺。英隊輸咗，酒客立即少晒。