亞扁周身蟻，亞太區股市中，台股最唔掂，散3.5%。港股算叻，恒指有0.65%進賬，H指同紅指更好，分別升1.50%與1.67%。中行（3988）續升3格，股民熱情未了，帶住一啲銀行股爬上去。個市估計繼續反覆向上，揀個別C輪埋手可也。
滙控C輪4485：滙控（005）最高136元，最低135.10元，高低只差0.90元，收135.40元，跌0.20元。中行有勢，建行（939）同交行（3328）因為平過佢，資金掟落去追。中銀香港（2388）屬中行同系公司，同氣連枝，再展升浪。中銀香港升升吓，滙控又會向上移動，滙控到底都係過於偏低。
趁低揀定滙控C輪，諗吓昨日稍為跌凸些少嘅4485（跌幅7.3%）。隻輪9月上旬夠鐘，輪價51仙，溢價2.6%，槓桿率26.6倍（有效15.3倍），引伸波幅15.4%。隻輪少少價內（行使價133.88元），街貨得10%或唔夠6球，而昨日則有35球易手，好明顯有拋波仔活動。
地鐵C輪9044：地鐵（066）連續第2日上升，收18.95元，進賬20仙，估計喺19元以下見短期底部，準備買啲C輪。
靚數據嘅地鐵C輪有9044，12月初夠鐘，輪價22.7仙，溢價8.4%，槓桿率8.4倍（有效5.2倍），引伸波幅35.3%。呢隻係新輪，掛牌3日，街貨非常少。
章盛