每次見到地鐵行政總裁周松崗，都有班人前呼後擁，鬼咩，佢係兩鐵合併後嘅CEO大熱人選，想同佢私下傾多兩句真係唔易，華華前兩日喺一個公開場合撞到佢，竟然冇人埋身，咁華華梗要把握機會同佢傾番幾句，話題離唔開仲有幾日就開波嘅世界盃。
一講到波，周松崗即刻醒晒，佢話世畀盃咁多場比賽，最刺激最好睇嘅唔係決賽，而係四強爭標嘅準決賽；事關四強為殺入決賽，一定會搏晒命。
反而去到決賽時，差一步就冠軍，兩隊好多時都會打得小心拘束，一開始唔會去得咁盡，所以通常都會悶足半場，直到是但一邊入波，先至開始有睇頭。
怪朗尼壞事
今年個個都將巴西捧成大熱，但周松崗就另有睇法，佢覺得巴西好少喺歐洲贏世界盃，往績麻麻，反而德國有地利，應該有優勢。
不過講到底，佢話自己曾經住喺英國好多年，最想就梗係英格蘭捧盃，最衰阿朗尼又有傷喺身，睇怕都好難成事啦！
李華華
讀者如有任何意見或報料，歡迎發送電郵至[email protected]。