當班支聯會成員趁噚日呢個不敢亦不能忘記嘅日子，日頭跑17公里跑到氣來氣喘，夜晚又齊集維園悼念六四17周年嘅時候，煲呔就啱啱帶住班商家佬由廣西去到雲南，同雲南省長徐榮凱見面。點知我哋阿特首同省長傾偈中途，竟然有人打電話畀佢，搞到煲呔要拿拿臨熄手電，全個過程畀亞記播晒出街，同全港市民分享。
如果大家冇睇亞視，唔緊要，八方同大家複述一次：煲呔噚日着深藍色西裝襯個藍白斜紋煲呔仔，都幾醒神，本來眼仔睩睩咁聽緊徐省長講嘢，突然有啲音樂響起，只見煲呔一邊伸手摷衫袋，一邊話：「對不起，我現在關（機）了。」全場人嘅視線都集中喺煲呔嘅衫袋，原來係佢電話響。佢㩒熄咗個銀白色手機之後嗰半秒，全場靜蠅蠅，都好尷尬。
見省長電話兩度響
不過徐省長見慣世面好識做，即刻客客氣氣咁話：「不要緊，你有事。」貴為特區揸弗人，梗係多電話啦，煲呔又出人意表咁幽番一默：「找我的一定是我們香港賣廣告的。」場中嘅人亦識做，一齊大笑。點知更好笑嘅係，隔咗幾分鐘，個電話又再響！今回煲呔真係熄咗部機，然後同省長解釋話呢啲就係香港人嘅煩惱，唔開機唔得，開又多人打嚟。
八方心諗，話晒都係同省長會面，點解佢會唔熄手機？仲響完一次都唔熄？唔通煲呔等緊重要人物嘅電話？又講唔通喎，就算重要到係阿爺打嚟同佢傾心事，都唔可以開定個手機，響呢啲場合講句「Excuseme」就起身行出房聽啩。抑或噚日呢個特別嘅日子，令煲呔好困擾，尤其係諗番起17年前同個仔「經過」大球場時「撞見」華叔嘅事，唔知點兜，煩到唔記得熄手機？
原來煲呔同八方一樣，成日受到電話錄音廣告騷擾！咦，電管局有關規管垃圾電話草案，區文浩局長下個月就交立法會審議，經過噚日呢一件事，你估會唔會加快立法規管進程呢？
煲呔事後同記者見面嘅時候，瘀事唔再提，只係講吓今次最關心嘅兩地空氣質素，其次就係香港喺9+2或者十一五嘅中介角色，簡單嚟講即係點樣令泛珠三角個個城市都咁發。本來好哋哋，但係一到澄清17年前「撞見」華叔單嘢，氣氛又變得好怪異，煲呔個樣唔知點，新聞統籌專員Andy更即刻故意望埋一邊，雖然粒聲唔出，但個表情好似自己講緊大話咁；相由心生啩。
傳真︰2623-9278
電郵︰[email protected]